A proposta pedagóxica do Centro
de Formación Padre Piquer (Madrid) baséase nas aulas cooperativas multitarea. Estas
aulas están organizadas por “ámbitos de ensino e aprendizaxe”: “Ámbito
Socio-Lingüístico” e “Ámbito Científico-Tecnolóxico”. Neste centro elimínanse
as barreiras físicas e proponse un novo espazo educativo con capacidade para
uns sesenta estudantes e no que están presentes un mínimo de tres docentes. Isto
implica un traballo en equipo por parte do profesorado, xa que o docente non
está só na aula e o seu traballo vese enriquecido pola aportación dos compañeiros.
Este centro educativo fomenta a
aprendizaxe cooperativa mediante o traballo en grupos heteroxéneos, nos que a
colaboración interpersoal é esencial no éxito da tarefa, e tamén a posibilidade
de realizar distintas tarefas na mesma aula. O alumnado comparte moitas horas
cos mesmos docentes, o que permite que a aprendizaxe sexa máis flexible e
dinámica, cunha atención máis individualizada e respectando os ritmos de cada estudante.
Outro método que se emprega neste
centro é a aprendizaxe baseada en problemas: preséntase o problema, identifícanse
as necesidades de aprendizaxe, búscase a información necesaria e finalmente vólvese
ao problema para solucionalo. O uso das TIC está moi presente nese proceso de
busca, organización e presentación da información.
No tocante á didáctica das
linguas, non sei ata que punto pode ser satisfactoria seguindo esta proposta. Paréceme
interesante a idea de eliminar barreiras e das aulas cooperativas pero, quizais
por descoñecemento, non comparto a idea de aulas tan numerosas e do traballo en
equipo de varios docentes na mesma aula.
Comentarios
Publicar un comentario