A proposta pedagóxica do IES
Miguel Catalán de Coslada (Madrid) baséase na aprendizaxe servizo. O alumnado
desenvolve diversos proxectos de aprendizaxe e servizos comunitarios con
diferentes entidades do seu concello: o banco de alimentos, a protectora local
de animais ou a biblioteca do hospital. Dese xeito, os estudantes non só actúan
no entorno educativo senón tamén máis alá das aulas e implícanse na vida do seu
concello e en temas sociais. A participación activa de todos os membros da
comunidade educativa neses proxectos contribúe á mellora da convivencia e á
transformación do entorno. Iso contribúe a unha aprendizaxe significativa, na
que o alumnado entende a utilidade dos coñecementos que está a adquirir e sente
a satisfacción de ver o froito do seu traballo.
Unha peza fundamental desta proposta
son as súas estruturas, nas que se implica o alumnado, o profesorado e axentes
externos como as ONG ou o Concello. Por exemplo, grupos de catro ou cinco
estudantes elixidos polos seus compañeiros forman círculos de convivencia
destinados a previr o acoso e a resolver conflitos.
Nas clases, foméntase o traballo
cooperativo traballando en grupos heteroxéneos supervisados por voluntarios
formados. Tamén se organizan debates temáticos e unha reunión semanal con
invitados externos.
No tocante á didáctica das
linguas, hai innumerables iniciativas de carácter social e comunitario que se
poden desenvolver incluíndo diferentes idiomas. No caso de lugares con
poboación estranxeira que non comparta a lingua ambiental, creo que podería ser
de grande axuda para a súa integración. A aprendizaxe servizo paréceme
especialmente interesante, pois considero que a escola non pode ser un ente
illado do resto da sociedade, senón que debe fomentar no alumnado a participación
activa como cidadáns e a súa implicación en diversas causas sociais.
Comentarios
Publicar un comentario