A proposta pedagóxica do CEIP
Amara Berri (San Sebastián) baséase nos principios de participación,
implicación e corresponsabilidade. Actualmente, esta proposta estase a desenvolver
en 19 centros máis do País Vasco e un das Illas Canarias que comparten a mesma
concepción da escola.
Este sistema educativo baséase na
convicción de que a escola debe ser unha simulación de vida, polo que os seus eixes
curriculares son os chamados “contextos sociais”. Estes contextos imitan o
mundo adulto e basean a aprendizaxe no xogo. As materias interrelaciónanse e en
todas se traballan as diferentes competencias curriculares. Por exemplo, no
contexto da tenda aprenden a mercar a vender, os pesos e as medidas, entre
outros coñecementos. Outro exemplo sería o desenvolvemento da competencia de
comunicación lingüística: cada alumno decide a temática na que quere profundar,
busca información na biblioteca, le e selecciona as ideas principais e logo
deféndeas oralmente ante os compañeiros.
Todas as tarefas e actividades
respectan o ritmo individual de cada estudante e a diversidade é considerada un
factor enriquecedor. Búscase desenvolver as competencias afectivas para
contribuír ao crecemento persoal e a unha boa socialización e convivencia.
Tamén se fomenta a asunción de responsabilidades por parte do alumnado e a súa
implicación na vida do centro, por exemplo, colaborando coas tarefas da
biblioteca.
No tocante á didáctica das
linguas, considero totalmente aplicable esta proposta. Dado que a finalidade dos
idiomas é a acción comunicativa, que mellor xeito de practicala que en contextos
que simulan a realidade? Ademais, sería unha maneira lúdica de integrar linguas
e aprendizaxe de contidos.
Comentarios
Publicar un comentario