A proposta pedagóxica do Colegio
Santa María La Blanca de Montecarmelo (Madrid) é un sistema de Educación Básica
Interactiva (EBI). Baséase no emprego das TIC e a elaboración dunha guía de
aprendizaxe para cada alumno segundo o seu perfil de aprendizaxe. Ese perfil é
o resultado dun diagnóstico elaborado entre o departamento de orientación, os
profesores especialistas, a familia e o propio estudante. Esa personalización do
ensino, en base ás motivacións, coñecementos e habilidades de cada un, permite
acadar unha aprendizaxe significativa.
Ademais das guías de aprendizaxe,
o alumnado deseña as súas propias experiencias de aprendizaxe nun caderno guía.
Os estudantes teñen citas de seguimento cos seus titores, nas que constantemente
se revisa o seu progreso, se modifican os seus obxectivos e se resolven
dúbidas.
Neste sistema educativo, as
clases non son iguais para todos, pois na mesma aula os alumnos realizan
diferentes tarefas. Non hai exames, pois cada alumno decide cando e como se
avalía a súa guía, e tampouco deberes, pois as guías están deseñadas para ser
completadas durante a xornada lectiva.
No tocante á didáctica das
linguas, creo que esta proposta pode ser aplicable. Comparto especialmente a dedicación
do alumnado ao estudo só durante a xornada lectiva, pois considero que é
preciso o tempo de descanso e lecer e as horas que pasa no centro educativo
deberían ser suficientes. Non teño tan clara a miña opinión sobre un xeito tan
flexible de avaliar como deixar en mans do estudante o cando e o como.
Comentarios
Publicar un comentario